Dini WordClock isch es mit Liebi vo Hand gmachts Bärner Qualitätsprodukt. Hie erfahrsch aues Wichtige zur Bedienig.
Ig wünsche dir viu Vergnüege mit dire nöie WordClock!
Gérard Tyedmers grrd.ch grrd@gmx.net
Dini WordClock chasch amne Computer mit USB-Aschluss oder amne USB-Stecker aschliesse. Wenn si z erste Mal startet, lüchtet "FIX WLAN" uf. Dini Uhr brucht es Wlan, für di aktuelli Zyt abzfrage und für ihri App erreichbar z mache.
Uf dim Handy oder Laptop muesch zu de Wlan-Iistellige, u dört söttsch es nöis Wlan gseh, wo WordClock heisst. Das muesch usläse. När sött im Browser e Site ufgah, wo du dr Uhr dr Name u ds Passwort vo dim Wlan chasch säge.Falls die Site nid outomatisch ufgeit, chasch im Browser ids Adräss-Fäud "192.168.4.1" iigäh.
Das muesch nume z erste Mau mache, d Uhr spicheret sech ds Passwort vo dim Wlan und verbindet sech outomatisch.
Wenn sech d WordClock mit dim Wlan het chönne verbinde, seit si dr ihri IP-Adrässe. Uf dr Uhr lüchtet nachenand öppe so öppis uf:
EIS NÜNI ZWÖI ° EIS SÄCHSI ACHTI ° EIS ° EIS EIS O
Bi dir chöi die Zahle chli anders sii. "°" bedütet Punkt (.) u "O" bedütet Null (0), auso i üsem Bispil "192.168.1.110".
Sobald d Uhr d Zyt aazeigt, chasch im Browser uf dim Handy i ds Adräss-Fäud "wordclock.local" iigäh. Das sött d WordClock-App uftue. Wenn das nid funktioniert, chasch als Adresse ou d IP-Adrässe näh.
Wenn du es iPhone hesch, chasch im Safari uf "...", "Teilen", "Zum Home-Bildschirm hinzufügen". Bi Android heisst das "Zum Startbildschirm hinzufügen". So chasch d App vo dire Wordclock starte, ohni im Browser müesse d Adresse izgäh.
Ir WordClock-App chasch du mit em Power-Chnopf unde links dini Uhr i- und usschalte. Ou wenn d Uhr usgschalte isch, brucht si no chli Strom, wüu d App ja immer no louft. Igschalte brucht si öppe zwöi Watt, usgschalte weniger als eis. Wenn de läger furt bisch, stecksch se gschider ganz us.
Mit em Zahnrad-Chnopf unde rächts chunsch zu de Istallige vo dire Uhr. Hie chasch zum Bispiu d Farb vor Aazeig ändere und wähle, öb si ir Nacht chli weniger häu lüchtet.
Mit Special-Effects chasch apasse, wie dini Uhr d Zyt azeigt:
Du chasch wähle zwüsche Farb-Verlouf, Rägeboge, Matrix, Puls und Schribmaschine-Effekt. Mit em Schiebregler chasch d Gschwindigkeit vo allne Effekte aapasse.
Mit em Guetzeiche unde rächts spicherisch dini Uswahl uf dr Uhr.
Usserdäm chasch mit dire Wordclock füf verschideni Spili spile: Snake, Tetris, SameGame, MasterMind u WordGuessr.
Falls es zu dire Uhr e ShanWan Q36 Bluetooth Controller gäh het, chasch fasch aui Spili ou mit em Controller stüre.
Dr Schiebregler unde am Controller mues uf "D" stah. Für e Controller izschaute und z verbinde, muesch unde dr chli "Pair"-Chnopf drücke. Während em paire, lüchtet ds Wlan-Zeiche uf dire Uhr zwöimau gäub u z letzscht einisch grüen. Jetzt isch dr Controller parat.
Mit dr "+"-Taschte chasch dür aui Spili blättere.
Mit dr "-"-Taschte chasch ds aktuelle Spil beände und zrugg i WordClock-Modus.
Zum Usschaute vom Controller chasch wieder d "Pair"-Taschte drücke. Wenn dr Akku mau läär isch, chasch ne am ne USB-C Kabel wieder uflade.
Bi Snake stürsch e grüeni Schlange über dini Wordclock. Ds Ziel isch, dr rot Öpfu z ässe. Mit jedem Öpfu wird dini Schlange chli länger und schnäuer. Wenn du id Wand oder i Buch vor Schlange fahrsch, hesch verlore.
Stüre chasch d Schlange mit dr App, mit de Pfili-Taste uf dire Tastatur oder mit dim Bluetooth-Controller, wenns zu dire Uhr eine gäh het.
Wie lang wird dini Schlange?
Bi Tetris gheie farbigi Blöck obe abe. Du chasch se nach links oder rächts verschiebe oder dräie, bis si unde aachöme. Du muesch d Blöck so härelege, dass es horizontal kei Lücke drzwüsche git. Wenn e Reihe voll isch, verschwindet si und git Pünkt.
Stüre chasch das Spiel mit dr App, mit de Pfili-Taste uf dire Tastatur oder mit dim Bluetooth-Controller, wenns zu dire Uhr eine gäh het. Mit em Pfil nach ufe oder mit de Schultertaste L und R oder A und B uf dim Controller chasch d Blöck dräie.
Wie mängi volli Reihe chasch mache, bevors ke Platz me het für neui Blöck?
SameGame isch es Puzzle-Spil, wo du farbige Blöck vo dire WordClock muesch lösche. Wenn du uf e Gruppe vo mindistens 2 glichfarbige Steine klicksch, verschwinde si. D Steine wo drüber si gsi, gheie abe. Wenn e ganzi Spalte läär isch, rütsche di verblibende Spalte zäme.
E einzelne Stei chasch nid lösche. Dört muesch probiere, dass im Verlouf vom Spiel einisch e glichfarbige näbedra gheit.
Stüre chasch das Spiel mit dr App, mit de Pfili-Taste uf dire Tastatur oder mit dim Bluetooth-Controller, wenns zu dire Uhr eine gäh het. Blöck lösche chasch mit Space oder Enter, oder mit A oder B uf dim Controller.
Glingt's dir, ds Spilfäld komplett z lääre?
Bi Mastermind muesch e gheime Farbcode errate. Nach jedem Versuech seit dr dini WordClock, wievil vo de vier Steine scho richtig si. Für jede richtig Stei lüchtet eis wisses Lämpli. Usserdäm gseh, wie oft du zwar scho di richtigi Farb hesch, aber no nid am richtige Ort. Das chasch a de häublaue Lämpli abzeue. Du weisch aber nid, wele Stei oder weli Farb scho richtig isch.
E Farb cha ou mehrmals vorcho.
Stüre chasch das Spiel mit dr App, oder mit dim Bluetooth-Controller, wenns zu dire Uhr eine gäh het. Uf em Controller chasch mit em Stür-Chrüz mit Links u Rächts dr aktiv Stei wähle. Mit Ufe u Abe chasch sini Farb ändere. Mit A oder B chasch di Versuch la bewärte.
I maximal 11 Versüech muesch dr Code usefinde. Schaffs es vorher?
Hie geits drum, Wörtli z errate. Uf dire Wordclock lüchte Buechstabe uf, wo ir richtige Reihefolg es Wort ergäbe. Ir App chasch di Lösigsversuech igäh. Wenns richtig isch gsi, gits e Punkt u es neus Wort wird azeigt.
Dr Punktestand gsehsch unde uf der Site.
Das Spili chasch mit beliebig vilne Spiler spile. Jede mues uf sim Händi d WordClock-App uftue u cha miträtle. Dr erst Spiler, wo ds Spili startet, startes für alli Spiler. Dr erst, wo ds Spili beändet, beändets für alli.